Acts 27

Ozan Kwoi Lo Roma

1Shi a ɓo ku shiri zo zhin, ntu geakuyialonyin Roman eya nuwan nya yi, a ku a Bulus ɓedo aza wan-wan ajei, fi n akurkuku guyi tukwoda ho akun, ai yi wo eye ge Jiliyos, esu gu yi nu ɓei n woi. 2Ya kuka n ʼya yi, nkwo ɓa lo kwoi kpegni aba yi mwabegye lo ce yi n Turki edna gbe. Aristakus ɓei gnisun n yi.

3Shi efye ɓei gyi ya si Sida, Jiliyos wa ye ge Bulus wo la gmi gni wa ɓi anugundo gna, ɓa gwo wo agmadayi. 4Shi yi ɓo je lo fi eya, ese dnagmayi kwa ci, to ya mi ya dna eya n zokwo m, har kwa zhin ya duya Saiprus sunbwa. 5Ya duya vivi n Silisiya yi, n Panfiliya yi, ya ɓe ya kpezhi n Mira n Lisiya ekni. 6Nɓo nu eyi tukwoda wato Jiliyos, wa gye eya a Masariyi nya, kwoi gmi Alekzanderiya, kwoi lo Italiya wa ku yi fi nkwo.

7– 8Yi ɓo ku anyipyei bwa n mwa, yi sun wahala n eya dna yi, ya si Kimdus deca, ese kwoi gna kala bwa-bwa, ya duya vivi n Karita, ya lo Salmoni. N wahala yi, ya lo peceye peceye, yi lo edna ʼgbe yi har ya ɓe aba ho a yi kwo ge Akpezhiba Manayi, vivi ezhi hoi a yi kwo Laisiya. 9Ya ku kpe zhi ɓo anyipyei n mwa begye. Ntu ge wahala ɓo nyi n aɓa zan-zan n kpai nyi, ntu ge vinyikwo ɓo la shi, Bulus wa gna a kurkuku gu yi tukwoda ge.

10“Ofye, mi gye lo wahala lo abye, kpekni yi ɓa sin asala eya kwa ɓaya, akaya ɓa bwi, aza ɓa bwa nyasan har efi.” 11Ama akurkuku guyi tukwoda to wa wo Bulus ɓe da m, sai aya dna yi tukwoda ɓeda. 12Shi kwo nyi Akpezhiba Manayi to ɓei bmiya n ɓa ɓa zhi n vinyikwo yi m, ayadna yi ɓa gna ge a zhin atna a lo Finiksa ɓo fi ɓo n vinyikwo yi. Finiksa ɓei zhin ayakpezhi ba manayi nu.

13Esa fyewyi ese kwa ya ci peceye ɓa gye ngye kwo bmiya lo ɓa kuka, ɓa lo eya ya, ɓa ya lo vivi edna ʼgbe yi.

14– 15Esa sun fyewyi ese nyakwo kwa ya ci n kala yi, kwa ce eya abwaya lo cei nla. Ɓa zhin atna ge ɓa jeze ɓe n eya yi la gbe, to ɓa mi m, ɓa fa kwo kwa ce kwa vi ese lo.

16Ya duya n muse ɓiyi ho avun, a yi muse yi ge Kalauda, nɓo nu n yi ɓo wankma deca, n aya ɓiyi-ɓiyi bmazhin yi, 17Ya mi ya gyi eya nawyi. Ayadnayi ɓai wo dna ge kpesun ese ɓa ce eya abwaya har kwa lo Afrika, kni, ntu deye ɓo, ɓa aje loya nɓa gyi eya she nyi.

18Shi efye ɓo gyi, ɓa gye ese kwoi gna cici, eya atnu-tnu yi ɓa ya akaya kunya fi n nuwan. 19Dna nyipyei tahi, ɓa kun eya atnu-tnu kaya anya yi vinya ɓa she ɓa ya. 20Ese yakwo kwa ci nkala yi to kwoi shan fa m har anyipyei mwa begye, ngmayi, har ɓa bugba gmiya n pwo-pwo ɓo yi.

21To aza yi gyi nyagyi m, ama Bulus wa yi aya tnu-tnu-zhin yi wa gna ɓa ge, “Ofye, fye ɓo gna fya wo mi ɓeda nkmisunyi, to ye kuka n Akpezhiba manayi m, to yo sin asara ye m. 22Ama agu tu yi ngye apma, zaho-zahoi ta bwi wo wye-wyei nuwan, eya ɓa ɓaya.

23“Ntu ge nsukwoyi naiye, Malaika omi Shekwoyi nya, n mi zhin wo bauta nyi, wa ɓe mi aba. 24Woi gna mi ge, ‘Bulus to wo edna m, ntu ge Shekwoyi ku howyegyi wo, sai ha gni agni n Kaisar abye, woi ɓa aza gni, nɓa gnifi n ya n hoi nyi’. 25Ntu cenu fye ku mi zhi, ntu ge mi la gaiciya ga Shekwoyi, kwo ɓa ze lo nu ngye shi wa da. 26Ama eya ɓa ɓaya ya wankma kpe n muse ho.”

27Dna nyipyei awo-cei-nyihi, ogma ɓedo n ʼse yi n sadu sa, yi kpe n nuwan Adriya nya, yi lo nawyei, na vuyi ese yi ce yi abwa ya, aya dnayi ɓa gye ngye yi ku wu vivi nkma yi. 28Ɓa mwi nuwa lolo ɓa gye kafa 120. Esa fyewyi ɓa je mwi, ɓa gye kafa 90. 29Shi ɓa ɓo gye lonu, ɓa kpe ge yi ku ga okma si, ama ntu edna ɓo ge kpekni agye akuta nyi ndna gbe, ɓa ya eya akpegninya fi nuwan ngun-anyi, ɓai shin-shin ge efye kwo gyi.

30Aya dnayi ho, ɓai ye ge ɓa busi ɓa fwa eya, ɓai la ya ɓai lo eya ɓiɓiyi ɓai zhin ngye ɓa ye ɓa ya eya kpegninya fi n nuwan nabye bwa. 31Ama Bulus wa gna asoja ɓedo nɓa tukwoda yi ge, “Fye ɓa ku fi vinya sai dai ozaho-zaho yi wa kpe dna n ya. 32Asoja ɓa zun owun ya, ɓa fwa eya ɓiɓiyi kwa kaya.”

33Shi efye ɓo la gyi, Bulus wa gyi aza wye ge ɓa ku nyagyi gyi wa ci ge, “Fye ku sun nu, a mako ngun aba to fyei to nyagyi wo m. 34Mi gyi fye wye fye ku nyagyi ntu fye lafiya ɓo! Ntu ge kwo tukwoyi gmanyi oza ho nya, kwo ta bwi m.”

35Shi wo ɓo zo da lonu, wa la bredi wa zhin Shekwoyi godiya nɓa abye vinya, wa sa wa gyi. 36Nsayi-sayi oɓa vinya ɓa bwa sauki ɓa ya nyagyi gyi. 37Aza vinya tagyi aba, ncei shi tnaba cei tnanyi (276) eyi yewa nu n yi ɓei fi n eya yi vinya. 38Shi aɓo ku nyagyi gyi aya atnu-tnu yi ɓa kun alkama ɓa she ya fi n nuwan eya shanwo kwa ce gmiya.

Eya La aya

39Shi efye ɓo la gyi, to ɓa kpe aba nɓa zhi-n ama ɓa ta wye ɓa gye okma n amwi yi, ɓa zhin shaula ge kwo ese ɓa ce ɓa bwaya fi akuta, kwa kun ɓa va kpe na mwi. 40Ɓa gna ɓa ɓa zhin atna ɓa gbe awun ya ɓa fwa eya akpezhi nya ya fi n nuwan, ɓa ya eya avun, ɓa ku eje wu abye ɓa lo edna gbe. 41Ama eya tukwo kwa lo kwa bi dna n amwi. Eya tukwo kwa bi dna dei-dei, eya avun kwa la wu, nuwan dokwo kwoi ɓe kwoi lu kwo nkalayi har eya kwa ya ɓaya.

42Asoja ɓa gna oɓa tukwoda ge, ɓa ku aza wan-wan wu vinya kada oza ho nɓa mi wa she nuwan wa piya wa busi. 43Ama Jiliyos to ɓei ye ge awu Bulus m, wa gna ɓa ge a to zhin lo nu m. Wa gna ɓa ge oza n wo ɓa mi wa she nuwan wo she wa piya tu nkma. 44Aza nɓa ce nyi, ɓa zhin atna ɓa wan eya apisayi ɓa wan kma. Elonu aza vinya ɓa ku wan kma n lafiya yi.